odia story book, odia story pdf, odia story book pdf, odia story writing, odia story princess, odia story for kid, odia story 2019, odia story writer, odia story all, odia anuchinta story, odia adhyatmika story, odia anabana story

ଘଡିରେ ରାତି ସାଢେ ଦଶଟା । ଫୋନ ଆସିଲା ପପୁ ବାବୁଙ୍କ ମୋବାଇଲ କୁ । ସେଥିରେ ଭାସିଆସିଲା ନାରୀ କଣ୍ଠ ଟିଏ । ସେପଟୁ ପ୍ରଶ୍ନ ହେଲା " କଣ ଶୋଇପଡିଲଣି "? ପପୁ ବାବୁ ଚୁପଚାପ ଉତ୍ତର ଦେଲେ " ନା ! କଣ କହିବ କୁହ" । ଏହାପରେ ସ୍ତ୍ରୀ ଲୋକ ଜଣକ ଟିକିଏ ବିଚଳିତ ସ୍ବର ରେ କହିଲେ "ସୁନୁ ବାପା ! ମୋତେ କିଛି ଭଲ ଲାଗୁନି ଗୋ । ମୁଁ ଆଉ ପାରୁନି । ଅଫିସ୍ ଘର ପିଲାଛୁଆ ବାପା ମା ମୁଁ କାହାରି ହୋଇପାରୁନାହିଁ । ମୋତେ ଲାଗୁଛି ମୁଁ ସମୟର ଚକ୍ରବ୍ୟୁହରେ ନିରସ୍ତ୍ର ଅଭିମନ୍ୟୁ । ମୋତେ ଲାଗୁଛି ଯେମିତି ସମୟଟା ମୋ ଜୀବନ କୁ ଉପହାସ କରୁଛି । ଅଫିସ୍ ର ଟେନସନ , ଘରେ ପହନ୍ଚି ପିଲାଙ୍କ କଥା ବୁଝ , ବାପା ମା ଙ୍କର ସୁବିଧା ଅସୁବିଧା ଆଉ ଏସବୁ ଭିତରେ ଘରକାମ ପାଇଁ ସମୟ ର ବି ଅଭାବ । ଏହା ଭିତରେ ମୁଁ ଖୁବ୍ ଥକିପଡିଲିଣି । ଇଚ୍ଛା ହେଉଛି ତୁମ କାନ୍ଧରେ ମଥାରଖି ଦି' ଘଡି ଶୋଇପଡନ୍ତି ଅଚିନ୍ତା ମନରେ । ତୁମକୁ ଛାତିରେ ଭିଡିଧରି ଭୁଲିଯାଆନ୍ତି ଏ କର୍ମମୟ ଜଞାଳଭରା ଦୁନିଆଁ କୁ । ତୁମବିନା ଅଧା ଅଧା ଲାଗୁଥିବା ଏ ଜୀବନଟା ଯେତେବେଳେ ପୂର୍ଣ୍ଣତା ଖୋଜେ ସେତେବେଳେ ତୁମକୁ ନପାଇ କି ଯେ କଷ୍ଟ ପାଏ ସେ କଥା ତୁମେ ଜାଣିପାରିବନି । କାହିଁକି କେଜାଣି ଆଜି ମୋ ମନ କହୁଛି ଏ ଭଲବହୂ ର ଆଖ୍ୟା ଟିକୁ ନିଜଠାରୁ ଦୂରକୁ ଆହୁରି ଦୂରକୁ ଦୂରଦିଗବଳୟର ସେପାରିକୁ ଫୋପାଡିଦେବାପାଇଁ । ମୋ ମନ ଭିତରେ ଲୁଚିରହିଥିବା ସବୁଯାକ କଷ୍ଟ କୁ କେଉଁଏକ ନିର୍ଜନ ସ୍ଥାନରେ ଚିତ୍କାର କରି କହିଦେବାପାଇଁ । କାହାକୁ କହିବି ମୋ ମନ କଥା ! ତୁମ ଫୋନ କୁ କଲ୍ କଲେ ତୁମେ ସବୁବେଳେ ବ୍ୟସ୍ତ । ମୋ ହୃଦୟ ର କଥା ବୁଝିବାକୁ ତୁମ ପାଖରେ ସମୟ ନାହିଁ । କାହାକୁ ଟିକିଏ ମନ ର କଥା କହିବି ଯେ ଶୁଣିବାକୁ ପାଖରେ କେହିନାହିଁ । ଏ ଜଞାଳଭରା ଜୀବନରେ ମୋତେ ଲାଗୁଛି ଯେମିତି ମୁଁ ନିଜ ସତ୍ତା ହରାଇବାକୁ ବସିଲିଣି ସୁନୁ ବାପା । ପାରିବ ମୋତେ କିଛିଦିନ ପାଇଁ ଏମିତି କେଉଁ ଏକ ଜାଗା ନେଇ ଯେଉଁଠାରେ ସମୟ ର ଏହି ଟିକ୍ ଟିକ୍ ଶବ୍ଦ ଟା ନଥିବ । ଯେଉଁଠି ତୁମଛଡା ମୋ ଭାବନା ର ଦୂରଦିଗବଳୟ ପର୍ଯ୍ୟନ୍ତ ଆଉ କେହିନଥିବେ "।
ଗୋଟିଏ ଦୀର୍ଘ ନିଶ୍ବାସ ଛାଡି ସେ ସ୍ତ୍ରୀ ଲୋକ ଜଣକ ପୁଣି କହିଲେ " ଛାଡ ! ମୋର ସେ ଭାଗ୍ୟ କାହିଁ ? ତୁମେ ଶୋଇଗଲଣି କି ? ହ୍ୟାଲୋ ହ୍ୟାଲୋ ... । ବୋଧହୁଏ ମୋର କଥା... ... ... ହଉ ଶୋଇପଡ । ରାତିବି ଅନେକ ହେଲାଣି । ଗୁଡ ନାଇଟ୍ "। ରାତି ପାହି ସକାଳ ହେଲା ।
ସକାଳୁ ଉଠି ମୋବାଇଲ ରେ ଏକ ଭୟେସ ମ୍ୟାସେଜ କୁ ଦେଖି ତାକୁ ଖୋଲିଲେ । ସେଥିରେ ଥିଲା ପପୁ ବାବୁଙ୍କ କଣ୍ଠ । ସେ କହୁଥାନ୍ତି " ଆରେ ଏ ପୂଜା ! ମୁଁଟା ବହୁତ ଖରାପ ନାରେ ! ତୁମକୁ ଏକୁଟିଆ କରିଦେଇ ଏଇଠି ଏତେ ଦୂର ରେ ଅଛି । ତୁମ କଷ୍ଟ ଦୁଃଖ ବୁଝିବାପାଇଁ ମୋ ପାଖରେ ସମୟ ନାହିଁ । ତୁମର ଫୋନ କଲ ବି ବେଳେବେଳେ ରିସିଭ୍ କରିପାରୁନି । ହଁ ତୁମର ମୋପ୍ରତି ଅଭିମାନ ଟା ଆଦୌ ଭୁଲ୍ ନୁହେଁ । ତୁମର ତ୍ୟାଗ କର୍ତ୍ତବ୍ୟ ଆଉ ଭଲପାଇବା ମୋ ପ୍ରତି ତଥା ମୋ ପରିବାର ପ୍ରତି କଳ୍ପନାତୀତ । ମୁଁ ଜାଣେ ସବୁର ଗୋଟିଏ ସୀମା ଅଛି । ସେ ସୀମା ଲଂଘିଗଲେ ଅମୃତ ବି ବିଷ ଆଉ ଭଲ ବି ମନ୍ଦ ର ମାନ୍ୟତା ପାଏ । ତାହା ହୋଇନଥିଲେ କଣ ରାମଚନ୍ଦ୍ର ସୀତାଙ୍କ ପରି ପତିବ୍ରତାଙ୍କୁ ତ୍ୟାଗ କରିଥାନ୍ତେ ? ସର୍ବଜନ ସମ୍ମୂଖରେ ନିଜର ପୁରୁଷୋତ୍ତମ ଗୁଣ ପାଇଁ ପବିତ୍ର ସୀତାଙ୍କୁ ପରିତ୍ୟାଗ କରି ଜଣେ ଅବଳା ନାରୀ ଆଉ ଜ୍ଞାତ ସତ୍ୟ ଉପରେ କୁଠାରଘାତ କରିଥାନ୍ତେ ! ତେଣୁ ତୁମର ପ୍ରତ୍ୟେକ ଟି ଅଭିଯୋଗ ମୋ ପ୍ରତି ସମ୍ପୂର୍ଣ୍ଣ ଠିକ୍ । କିନ୍ତୁ ପୂଜା କେବେ ଭାବିଛ ତୁମ ବିନା ମୋ କଥା । ତୁମ ପାଖରେ ତ ବାପା ମା ପିଲାଛୁଆ ସମସ୍ତ ପରିବାର ଅଛନ୍ତି ; ତଥାପି ତୁମେ ଏକା ! ଆଉ ମୁଁ ? ଜାଣିଛ ତୁମ ବିରହ କୁ ଭୂଲାଇବା ପାଇଁ ମୁଁ ନିଜକୁ କେତେ ବ୍ୟସ୍ତ ରଖୁଛି ! ଯେତେବେଳେ ତୁମ ସହ କଥା ହେବାକୁ ଇଚ୍ଛା ହେଉଛି ତୁମେ କର୍ମ ଜଞାଳରେ ବ୍ୟସ୍ତ । ଆଉ ତୁମେ ମୋତେ ଖୋଜିଲା ବେଳକୁ ମୁଁ ଅର୍ଥ ରୋଜଗାର ରେ ବ୍ୟସ୍ତ । ତୁମେ ମନେପଡିଗଲେ କେତେଥର ତୁମ ଫେସବୁକ୍ ଏକାଉଣ୍ଟ କୁ ଖୋଲେ ଆଉ ବନ୍ଦ କରେ ତାର ହିସାବ ନାହିଁ । ସବୁଦିନ ମୁଁ ତୁମ ଶୋଇବା ପର୍ଯ୍ୟନ୍ତ ଅପେକ୍ଷା କରିଥାଏ । ଆଉ ଅପେକ୍ଷା ଥାଏ ଶୋଇବା ପୂର୍ବ ର ସେହି ଶେଷ କଲ୍ କୁ । ଯେଉଁଥିରେ ତୁମେ ମୋତେ ରାଗି ହୋଇ ତାଗିଦ୍ କରି କହିଥାଅ ପ୍ରେସର ଟ୍ୟାବଲେଟ ଖାଇବା ପାଇଁ । ମୁଁ ଖାଇବାକୁ ଭୁଲିନଥାଏ । କିନ୍ତୁ ଜାଣ ମୁଁ କାହିଁକି ଭୁଲିବାର ଅଭିନୟ କରେ ? କାହିଁକି ନା ତୁମର ସେ ରାଗ ଭିତରେ ଥିବା ଭଲପାଇବା କୁ ଅନୁଭବ କରିବାକୁ ଚେଷ୍ଟା କରୁଥାଏ । ତୁମର ସେହି ଫୋନ କଲ ଟା ସବୁଦିନ ମୋତେ ଜଣାଇଦିଏ ତୁମର ମୋ ପ୍ରତି ଥିବା ଭଲ ପାଇବା କୁ ଆଉ ମୋ ପରିବାର ପ୍ରତି ତୁମର ଉତ୍ସର୍ଗ କୁ । ମୋ ପାଇଁ ତୁମ ମନ ଆଉ ତୁମ ପାଇଁ ମୋ ମନ ଠାରୁ ସୁନ୍ଦର ଜାଗା ଏ ଦୁନିଆଁରେ ନଥିବ । ତୁମେ ଥିବ ମୋ ମନରେ ଆଉ ମୁଁ ଥିବି ତୁମ ମନରେ । ଥରେ ଖାଲି ତୁମେ ମୁଁ ଆଉ ମୁଁ ତୁମେ ହୋଇ ଅନୁଭବ କରିବା ଦୁହେଁ ଦୁହିଁଙ୍କୁ । ଦେଖିବ ତୁମର ସବୁ ପ୍ରଶ୍ନ ର ଉତ୍ତର ମିଳିଯିବ । ଆଉ ଶେଷରେ ଆଇ ଲଭ୍ ୟୂ ପୂଜା "।
ଏହାପରେ ପୂଜା ମ୍ୟାଡାମ ଫୋନ କଲେ ପପୁ ବାବୁଙ୍କୁ । ଆଉ କାନ୍ଦି କାନ୍ଦି ପଚାରଲେ " ହ୍ୟାଲୋ ! ପ୍ରେସର ଟ୍ୟାବଲେଟ କାଲି ରାତି ରେ ଖାଇଥିଲ "? ସେପଟୁ ଉତ୍ତର ଆସିଲା " ତୁମେ ନକହିଲେ କଣ ମୁଁ କେବେ ଖାଇଛି "? ଆଉ ଉଭୟଙ୍କ ଓଠ କୁ ଛୁଇଁ ଯାଉଥିଲା କେଇଟୋପା ଅଶ୍ରୁ ॥
॥ ଜ୍ୟୋତିରଞନ ସାହୁ ॥